மகனே...

 

மனிதனே

என்று

கடவுள் முணுமுணுப்போடு

அரை மனதாய் கூப்பிட்டார்.

மனிதனின் கூகிள்முன்

அவரது மழுவாயுதம் சூலாயுதம்

எல்லாம்

மடங்கிக்கொள்ளுமே

என்ற தயக்கம் தான்.

இருப்பினும்

அவர் தானே கோடி கோடி

பிரபஞ்சங்களின் கரு.

பரவாயில்லை இந்த விளையாட்டு யுத்தம்

என்று

மெல்லிதாய் "மகனே" என்றார்.

இப்போது தான்

அந்த ஜெல்லி போர்த்த கூகிள்குழம்பு

அவருக்கு வழி விட்டது.

நுழைந்து விட்டார்

நுங்கு போல் குழைந்து கிடக்கும்

அந்த மனிதனின் முரட்டுப்பாறைக்குள்.

மகனே

உன்னிடம் கேட்கிறேன்

அந்த ஞானப்பழத்தை என்னிடம் 

கொடுத்து விடு.

உன் சிந்தனைகளால்

உன் அறிவுக்கூர்மையால் 

எச்சில் படுத்தப்பட்டதைக் கேட்கிறேன்.

மனிதனை மனிதனாகவே படைக்க‌

உன் "அல்காரிதங்களை"க்கொண்டு

அலங்காரம் செய்யப்பட்ட 

அந்த‌

ஞானப்பழத்தையே கேட்கிறேன்.

______________________________________________________