தரிசனம்.

கண்டவர் விண்டதில்லை.

விண்டவர் கண்டதில்லை.

கடவுள் என்கின்ற ஒரு

மனப்பொருள் இங்கு கண்டார்.

மற்றவர்க்கு சொல்லிவிட‌

மடை திறந்தார் வெள்ளமென‌

தொண்டை எல்லாம் இங்கு

வற்றியது வார்த்தை இல்லை.

மொழிகளோ போதவில்லை

விழிகளோ இருளாகின.

யார் அவர் சொல்லு

அடையாளம் என்ன என்ன?

எது தான் என்று சொல்லு.

இது என காட்டு போதும்.

மக்களோ மொய்த்துவிட்டார்

எங்கணும் மக்கள் கூட்டம்

அலையென கடலென‌

ஆர்ப்பரித்திட்டார்.

பொறுங்கள் பொறுங்கள்.

கடவுளுக்கு அருகில் சென்று

பார்த்ததை பிம்பம் காட்டி

சொல்கிறேன் இங்கே

காண்மின் காண்மின்.

ஜேமஸ்வெப் என்றொரு

தொலைநோக்கி சொன்னது.

மனம் எனும் பலூன்கள் 

வேண்டாம்.

கற்பனை எனும்

கலக்கலும் வேண்டாம்.

விரிவாய் நன்கு இங்கே

உற்று நோக்கிடும் ஒரு

கருவி உண்டு.

கருவிலும் துருவிப்பார்க்கும்

கணிதங்கள் இங்கு உண்டு.

அகம் புறக்கண்கள் உண்டு

அலசலாம் அறிவால் நன்கு

அறியலாம் தெளிமின் தெளிமின்.

விடைத்த‌தோர் ஆற்றல் இங்கு

வெடித்ததன் பெருவெடிப்பே

விரிந்து மேல் விரிந்து வீங்கி

விண்வெளிக்கடலாய் ஆச்சு.

கடலென்றால் கரைகள் இல்லை.

சொல்லவோ உரைகள் இல்லை.

இருப்பினும் பெரிய உண்மை

கண்டதைச் சொல்லுகின்றேன்.

துடிப்பும் வெடிப்பும் எல்லாம்

ஒன்று தான் உணர்ந்து கொள்வீர்.

துடிப்பதற்கும் முன்னே இருந்த‌

தடம் ஒன்று கண்டுகொண்டேன்.

காலமும் வெளியும் இங்கு

உருண்டு திரண்டு ஒரு

உருவம் பிடிக்கும் முன்

எல்லாம் ஒரு கூழ் தான்.

அந்தக்கூழியம் எனும் 

ஃப்ளூடிடிஏ

பல் உருவம் காட்டும்

பூதங்களாச்சு.

வண்ணத்துப்பூச்சி 

வடிடிவமும் உண்டு

வவ்வால் என்றொரு 

வடிவமும் உண்டு.

சிறகு முளைத்த‌

தேவதை உண்டு

இன்னும் இன்னும்

உருவங்கள் உண்டு.

அந்த "ஒளிப்புலமே"

நெபுலம் என்று உண்டு.

அதனுள் ஒரு கணம்

ஆற்றலும் நிறையும்

அடர்வு கொண்டதில்

பெருவெடிப்பே ஒளியின்

பெருந்துடிப்பே ஆனது.

அந்த கன்னிக்குடம்

உடைந்து போனதில்

வெளியும் வழியும்

விரிவு கொண்டது.

சிலம்பு உடைத்த‌

அந்த கண்ணகி யார்

என உருவகமாய்

உற்றுப்பார்த்தேன்.

ஹைட்ரஜன் பரல்களும்

ஹிக்ஸின் துகள்களும்

தெறித்த கணமே

பிரபஞ்ச‌த்தின் ஒரு

குவா குவா 

கேட்ட கணமாம்.

அந்த சீற்றம் எதுவென‌

கணிதம் கண்டேன்.

ஸ்டீஃபன் ஹாக்கிங்

சொன்னது அதுவே!

ஒற்றையாய் வந்த‌

கற்றையின் கனப்புள்ளி

சிங்குலாடியாய் ஒரு

சித்திரம் விரித்தது.

என்ட்ரோபி எனும்

கணித சமன்பாடு

எல்லாம் சொன்னது.

எல்லாம் புரிந்தது.

புரியும் வரை

கேட்டோம் கேட்டோம்

அம்புலிமாமாக்கதைகள்

ஆயிரம் ஆயிரம்.

அறிவெனும் பேழை

திறந்தது கண்டோம்.

மற்றவை யாவும் 

பிழை எனக்கண்டோம்.

ஜேம்ஸ்வெப் இனி

காட்டும் தரிசனம்

அறிவின் ஆலயம்

காட்டும் தரிசனம்.

_______________________________________